رۆژنامەی (هەولێر) مافی رۆژنامەنووس ئومێد پشدەری پێشێل دەكات و ڕێكخراوی چاوی ئەمڕۆش ناڕەزایی لەم بارەوە دەردەبڕێ‌
25/06/2013
جاری خوێنراو225
هەورێ‌ پرێس/ هەولێر رۆژنامەی (هەولێر) مافی رۆژنامەنووس ئومێد پشدەری پێشێل دەكات و ڕێكخراوی چاوی ئەمڕۆش ناڕەزایی لەم بارەوە دەردەبڕێ‌. لە ڕوونكردنەوەیەكدا ڕۆژنامەنووس ئومێد پشدەری كە بڵاوی كردووەتەوە ئاماژە بەوە دەكات كە ڕۆژنامەی هەولێر مافی پێشێل كردوووە بە پێنەدانی مووچەكەی خۆی, لە بەرامبەر ئەمەش دا ڕێكخراوی چاوی ئەمڕۆ بەیاننامەیەكی دا كه‌ كۆپیه‌كی ده‌ست هه‌ورێ پرێس كه‌وتووه‌ ناڕەزایی دەردەبڕێ‌ و ئەم هەڵوێستە بە بە پێشێلكاری دەداتە قەڵەم و دەڵێت ناوبراو ئەو هەقەی هەیە پەنا بباتە بەر دادگا و یاسا. ئەمەی خوارەوە تەواوی بەیاننامە ناڕەزاییەكەی ڕێكخراوی چاوی ئەمڕۆیە سەبارەت بە پێشلكاری بەرامبەر ڕۆژنامەنووس ئومێد پشدەری: رۆژنامەی (هەولێر) مافی رۆژنامەنووسێك پێشێل دەكا! بەپێی ئەو روونكردنەوەی رۆژنامەنووس (ئومێد پشدەری) كە ڕۆژی 23/6/2013 بڵاویكردۆتەوە و بە ئێمەش گەیشتووە، رۆژنامەی (هەولێر) مافی ناوبراوی پێشێلكردووە لە پێنەدانی مووچەكەی و هەروەها ئاماژە بە گەندەڵی و ناعەدالەتی دەكات كەلە ناو رۆژنامەكەدا دەگوزەرێت. رێكخراوی چاوی ئەمڕۆ، لەگەڵ ئەوەی وەرگرتنی مووچەكەی و رێزگرتن لە را و بۆچوونی رۆژنامەنووس (ئومێد پشدەری) مافێكی ئاسایی و سەرەتاییە، هاوكات بە پێچەوانەوە بە پێشێلكاری دەداتە قەڵەم لە پڕۆسەی كاری رۆژنامەوانی و رۆژنامەنووسی ناوبراو ئەو هەقەی هەیە پەنا بباتە بەر دادگا و یاسا. هەر لەم روانگەیەوە رێكخراوی چاوی ئەمڕۆ، داوا لە سەرجەم رۆژنامەنووسان دەكات لە هەر حاڵەتێكی پێشێلكردنی مافەكانیان ئاگادارمان بكەنەوە و لە بەرامبەر هەر پێشێلكارییەك بێدەنگی هەڵنەبژێرن. دەستەی ڕاپەڕاندن رێكخراوی چاوی ئەمڕۆ 23/6/2013